Uploader's Comments

P.M.S.

Scitote, Vos quorum interest humanitatis, justum esse dolorem & nolentem mori, qui per difficilem lapidem verba quaerit. EDOARDUS ST. JOHN, faelicissima natura, usus ad repentinam gloriam brevi vixit, speciosum inter homines exemplar, imo ad omne magnificum contendens, annorum tantum fit egenus. Non enim citius virtute, fortuna, fama bona, ornarat Familiam, quam per istas jubetur umbras transire haud sicco pede. Eheu! festine satis reliquias mortales Majorum cineri promiscuas florida juventute [sed placide] misit, cetera scilicet in caelum raptus. Quantus in hoc elato marmore relinquitur, vos videte qui viventem colebatis, victurum lugebatis, et vos etiam qui vita, functum desideretis. Sic ille stetit olim, ut erectus jam imaginatus est, adversum impetus incivilis belli, et rigidas minas armatae mortis honesto vultu fidentique pectore tulit. Sic enim ille cecidit ut stantem putes, et mente saltern immobilem. Quinimo superstitem voluit amicorum subinde lachrimis proborumque memoriae amor parentis optimi, cujus pietas hunc lapidem fecit eloquentem. Obiit pridie Iduum Aprilis Anno MDCXLV